BAGO CITY – Patay na sang nakit-an ang 11-anyos nga bata matapos ini nalumos sang ginlagas sini ang naanod nga tsinelas sa suba sa Purok Narra, Brgy. Ma-ao, sa syudad sang Bago sang Lunes, Agosto 29.
Base sa pahayag sang lolo sang biktima, takna la una sang hapon, nahulog ang tsinelas sang biktima sa suba kag gintinguhaan sini nga makuha ang tsinelas.
Apang naanod ang biktima bangud sa mabaskog nga balod sang tubig nga tuga sang pagbaha bangud naman sa madamol nga pag-ulan.
Gintinguhaan pa sang 44-anyos nga iloy nga si Myra Gargaceran nga masalbar ang iya bata apang naanod man ini.
Dugang pa sang manghod sang biktima, nakakapyot pa ang iloy sa kawayan sa higad sang suba apang posible nga nakabuya ini bangod sa kabaskugon sang balod.
Takna las syete sang gab-i na sang nakit-an ang lawas sang bata sa may dako nga bato sa tunga sang suba kag gindala ini sa Ma-ao Health Center.
Nagapadayon naman ang search and retrieval operation agud marekober ang lawas sang iloy.
