Tuesday, December 6, 2022

11-Anyos nga Bata nga Babayi Ginhimuslan sang 76-Anyos nga Kaingod sa Bacolod

- Advertisement -

Nagapangayo sang bulig ang isa ka amay nga madakpan ang 76-anyos nga si Lolo Valentine nga ila man lang kaingod balay matapos ini ang ginatudlo nga naghimulos sang ila 11 anyos nga bata nga babaye sa sulod sang tatlo ka tuig.

Photos from RB Sweet FM Bacolod facebook page
Photos from RB Sweet FM Bacolod facebook page

Ginsaysay sang amay (hungod nga gintago ang ngalan agud ma-proteksyunan ang biktima) sa Radyo Bandera nga sadtong bulan sang Marso lang nila natukiban ang ginhimo sang tigulang sa ila bata.

Nag-umpisa ang pag-molestya sa bata sang ini ang 8-anyos pa lamang.

- Advertisement -

Suno sa amay, sadtong bulan lamang sang Marso sini nga tuig 2022 nag-abot ang bata nga babayi sang tigulang halin sa luwas sang pungsod.

Base sa sworn statement sang biktima, takna las 8 sang gab-i, sadtong Marso 19, 2022 nakita, suno pa sa anak sang tigulang, nga nagapangayo sang kwarta ang biktima sa iya amay.

Kabahin sa sworn statement sang biktima nga nangakig ang bata sang tigulang kag gintawag pa siya nga “kaplog” kag wala pa ini makontento kag ginkastigo ang biktima rason nga gin-updan ini sang iya amay kag iloy sa Station 7 agud magpa blotter.

Sa pagpang-usisa naman sang Women’s and Children Protection Desk (WCPD) sang nasambit nga police station, didto natukiban nga ginahatag-hatagan gali sang tigulang ang biktima sang kwarta kabaylo sang paghimo sa iya bilang pala-utwasan.

Sa interview sang Radyo Bandera sa amay sang bata, indi sila makapati nga mag-asawa nga mahimo ini sang tigulang sa ila bata bangud lolo ang tawag sang biktima sa tigulang.

Suno sa amay, nangin masako sila nga mag-asawa sa ila pagpangita sang kinawala, nagabulo-baligya ang iya asawa samtang siya naman ang nagapang “scrap” lamang rason nga masami nga mabilin sa ila balay ang ila kabataan lakip na ang biktima kag didto sila nagahampang kag nagalantaw sang TV sa balay sang tigulang.

Ginalantaw naman nga rason sang amay, kun ngaa wala nagapanugid ang biktima sa ila bangud sa kwarta nga ginahatag-hatag sang tigulang.

Posible man nga ginapahog sang tigulang ang bata kun magapanugid ini, suno pa sa amay.

Sandig naman sa physical examination, may yara sang “laceration” sa kinatawo sang biktima.

Samtang ginkumpirmar naman sa Radyo Bandera ni PCpt. Elmer Bonilla, hepe sang Bacolod Police Station 7 nga nag-abot na sa ila talatapan damlag lang ang “warrant of arrest” nga ginpapanaug sang korte batuk sa tigulang.

Suno pa kay Bonilla, gina-work out na karon sang mga operatiba sang Station 7 agud madakop ang senior citizen nga suspetsado.

Nagapanawagan naman ang amay sang biktima sa tigulang nga magsungka nalang kag pangatubangon ang kaso batok sa iya.*

- Advertisement -
Shiela G. Gelera
Shiela G. Gelera
Shiela G. Gelera is a Bacolod City/Negros Occidental-based journalist who has covered various beats since she started her media career in 2013 up to the present. She had worked with the oldest local daily newspaper in the Visayas before she hopped into the broadcast industry. Currently the news director of Radyo Bandera Sweet FM Bacolod. Aside from being with the local media outfit, she is also a news stringer for a national media network and a story contributor for a local news daily in Bacolod.

Related Articles

Leave a Reply

Stay Connected

- Advertisement -

Latest Articles