Nagapangatubang na karon sang kaso nga statutory rape ang 40-anyos nga fried chicken vendor nga naghimulos sa menor de edad nga babayi sa Barangay 40, syudad sang Bacolod.
Sa interview sang Radyo Bandera Bacolod kay P/Capt. Portia Nillosan, bag-o nga pinuno sang Women and Children Protection Desk sang Bacolod, iya ginpahayag nga las 7 sang aga sadtong Sabado, Abril 15, 2023 natabo ang insidente.
Pareho nga naga-board ang suspek kag ang 12-anyos nga biktima sa isa ka balay sa Barangay 40 kung diin antis makalab-ot sa kwarto sang biktima, malabay anay sa kwarto sang suspek.
Sang paglabay sang biktima, gintawag ini sang suspek. Abi sang biktima nga may kinahanglan lamang ini bangud nakaagi na nga naghulam man ini sang charger.
Ginhambalan sang suspek ang biktima nga masulod sa kwarto kag dal-on lang sa sulod ang iya tsinelas.
Pagsulod sang biktima, gintayaan ini sang kutsilyo sang suspek kag ginhambalan: “Hipos, indi manugid kay patyon ta ka.”
Natigayon nga nahimuslan ang 12-anyos nga menor de edad.
Matapos sang insidente, wala nanugid ang bata apang na-observe sang iya ginikanan nga may naglain ukon may pagbag-o sa menor de edad. Nakaagi man nga ginpukaw nila ini apang wala na nagagiyo gani natingala sila kag ila ini ginkumprontar. Didto kag nanugid ang bata sa gin-obra sang suspek sa iya.
Gilayon nagreport ang ginikanan sa pulis kag ginpaidalum sa medico legal ang bata. Base sa result, positibo ini nga ginhimuslan.
Nag-attempt pa ang suspek nga makapalagyo apang tigayon man nga nadakpan samtang pasakay sa jeep sa Barangay Bata, Bacolod City.
Nahibaluan nga may record man ang suspek sa Pampanga sa kaso nga rape.
Samtang yara sa sulod sang custodial facility sang Bacolod Station 6, nagahibi-hibi ang suspek kag iya gin-alegar nga hubog lang siya kag wala ini makahibalo kung ano ang nagsulod sa iya paminsaron nga amo sadto ang ginhimo niya sa bata.
Gindugang pa sang suspek nga wala niya man ginpasulod gid ang iya kinatawo bangud nagahambal ang bata nga sakit na.
Apang, base sa resulta sang medical exam, may yara sang indication sang laceration kag penetration sa kinatawo sang menor de edad.*
