Nadakpan sa Calamba, Laguna ang dose ka miyembro sang fraternity nga imbolbado sa kamatayon sang estudyante sa hazing rites sa Sorsogon sadtong 2020.
Ang mga suspetsado nga mga wanted sa kamatayon ni Omer Despabiladeras sadtong Pebrero 2020 amo sanday Ronnel Balaguer, Billy Berania, Ulysses Berania, Arman Bunyi Jr., Archie Dipon, Mar Charnel Fajardo, Johnson Gealone, Runy Gerero, Remdrant Gerolao, Ronmark Godala, Reniel Guran kag Arvin Nuñez.
Ang mga suspetsado ang nalakip man sang listahan sang 10 most wanted persons sa Bicol.
Sandig sa report sang kapulisan, naga-meeting ang mga suspetsado sa isa ka balay sang sila ang ginpangdakop sang joint team sang Bicol kag Laguna police.
Suno sa kapulisan, duwa ka miyembro sang mga na-aresto ang nagdala pa kay Despabiladeras sa hospital.
Gindakop ang mga suspetsado base man sa gin-issue nga warrant of arrest nga ginpetsahan Agosto 2020.
Nahibaluan man nga si Despabiladeras ang nag-collapsed samtang yara sa hazing rites nga ginpatigayon sang mga miyembro sang Tau Gamma Fraternity sa Barangay San Vicente.
Gindeklarar nga dead on arrival si Despabiladeras sa Pantaleon Gotladera Memorial Hospital.
Wala naman sang piyansa nga ginrekomendar sang mga suspetsado nga magapangatubang sang pagbayolar sa Anti-Hazing Law.
