12 ka mga Doctors sa Negros Occidental Boluntaryo nga Magapabakuna sa COVID-19 Ceremonial Vaccination sa TJMPH

Nakuha na sang katapo sang Provincial Incident Management Team ang 1,600 ka doses sang Sinovac vaccines gikan sa cold storage sang Bacolod City Emergency Operation Center kaina sang aga.

Ang Sinovac vaccines ang gamiton para man ibakuna sa 12 ka mga doctor gikan sa apat ka mga ospital sang probinsya nga nagboluntaryo para sa ceremonial vaccination sa Teresita Jalandoni Memorial Provincial Hospital sa siudad sang Silay bwas las dos sang hapon.

Suno kay Provincial Administrator Atty. Rayfrando Diaz, katunga sang 1,600 ka doses ang ibakuna para sa 800 ka mga medical frontliners nga luyag magpabakuna gamit ang Sinovac.

Sa record sang PIMT may 1,700 tanan ka mga medical frontliners ang naka-rehistro para sa bakuna.*