Ginpasakaan na sang kaso ang dalaga nga naga edad pa lamang sang 19 anyos sa probinsya sang Biliran, matapos nga naghimo himo sang istorya nga gin “kidnap” siya kag ginpalapta pa ang istorya sa social media.
Ginkumpirmar sang mga katapu sang Naval Municipal Police nga peke ang impormasyon nga ginpalapta sang babaye angut sa pagkuha sa iya, gamit ang puti nga van, sang Agosto 20 sang hapon, sa Barangay Santissimo Rosario Poblacion sa banwa sang Naval.
Gin imbestigahan sang kapulisan ang kaso sang kidnapping kag diri nahibaluan nga himo himo lamang sang dalaga ang istorya.
Residente sang Cabugcayan sa probinsya sang Biliran ang babaye.
Suno sa kapulisan, wala man sang kaso sang kidnapping nga nagluntad sa lugar, base sa record sang CCTV.
Magluwas sini, may mga witnesses man nga nagpalayag nga wala sang komosyon okon insidente sang kidnapping sa lugar kag sa petsa nga ginatumod sang dalaga.
Natalupangdan sang mga otoridad nga nagabag-o bag-o man ang statement sang 19 anyos nga babaye.
Kaso nga pagbayolar sang Article 154 sang Revised Penal Code, o Consummated Unlawful Use of Means of Publication and Unlawful Utterances ang ginpasaka sang mga otoridad batuk sa dalaga.
Nagpanawagan ang mga pulis sa probinsya sang Biliran sa publiko nga likawan ang pagpalapta sang indi kumpirmado nga balita okon impormasyon nga mahimo magdulot sang pagkahangawa sa mga pumuluyo.
