![](https://i0.wp.com/radyobandera.com/wp-content/uploads/2022/08/Bike-stolen-in-Bago-City.jpg?resize=579%2C388&ssl=1)
Dakup ang 19-anyos nga lalaki nga gin-alegar nagkawat sang bike sa sulod sang Bago Public Market sa Barangay Poblacion, syudad sang Bago, Negros Occidental, Huwebes sang hapon, Agosto 11, 2022.
Ginkilala ang suspek kay Dorwin Arevalo, 19-anyos, residente sang Barangay Don Jorge Araneta sa syudad sang Bago.
Sandig sa imbestigasyon sang Bago Police Station, yara ang 25-anyos nga tag-iya sang bike sa ila nga balay sang ginhulam sang iya menor de edad nga pakaisa ang mountain bike.
Makaligad ang pila ka oras, ginpahibalo sang minor ang tag-iya nga nakawat ang bike nga yara naka-park sa sulod sang merkado samtang ini ang nagapagunting.
Naglibot ang tag-iya kaupod ang menor de edad sa dalanon gamit ang iya nga motorsiklo padulong Barangay Malingin Road.
Sang yara na sila sa Purok Roadside, Barangay Lag-asan, nakita nila si Arevalo nga nagasakay sa nasambit nga mountain bike.
Ginkumpronta nila ang suspek nga gilayon man nanaog sa bike kag nagdalagan apang nalagas kag tigayon nga nadakpan sa bulig man ni P/Cpl. Mark Greggy Luto nga yara sa lugar.
Nagabalor P15,000 ang nasambit nga mountain bike.*