Duwa ka luxury car sang mga opisyal sang Pharmally Pharmaceutical Corp. ang wala sang record, suno sa Bureau of Customs (BOC).
Suno kay Sen. Sonny Angara, ginsiling sa iya ni BOC Commissioner Rey Leonardo Guerrero nga duwa ka luxury car ang wala sang record sa ila matapos ginpamangkot ni Sen. Richard Gordon kung may record ang BOC sang mga salakyan sang mga Pharmally executive.
“All of the vehicles have appeared in their records as having gone through the process the legal processes and the payment of taxes and duties except for the 2021 Porsche 911 Turbo S and the 2021 Lexus RCF,” pahayag ni Angara.
Isa nga Porsche ang nakarehistro kay Pharmally Corp. secretary and treasurer Mohit Dargani kag isa ka Lexus kay Pharmally director Linconn Ong, base sa LTO record nga ginpakita ni Gordon sa Blue Ribbon Committee Hearing.
Sadtong Oktobre, nabungkal sa ika-13 ka hearing sang Blue Ribbon Committee ang tax records sang Pharmally officials kag pila ka anay opisyal sang gobyerno nga imbolbado sa transaksiyon.
Indi makapati ang pila ka senador nga may tax refund pa ang Pharmally sa tunga sang pagpati nga kulang ang ginbayad sini nga buwis sa gobyerno.
