Narescue sang Philippine Navy ang duha ka Malaysian kag duha man ka Filipino nga nagpautaw-utaw sa sulod sang 15 ka oras matapos magkulob ang ginasakyan nga speedboat sa baybayon sang Sibutu Passage, Tawi-Tawi.
Ginkilala ang mga narescue nga pasahero nga sanday Hassan Bin Sayadi, 59; Majid Bin Ajahun, 46; Jerry Erni, 35; kag Solar De Leon, 40.
Suno sa Navy, apat ka pasahero nagikan sa Sabah ang nagatransport sang light cargoes padulong sa Bongao Island sa Tawi-Tawi via Sibutu Passage sang magkulob ang ginasakyan nga speedboat bangud sa malain nga tiempo takna las-6 sang gab-i sang Huwebes nga adlaw, Oktubre 7.
Naglubog ang speedboat dala ang light cargoes.
Nakit-an naman ini sang bulk carrier kag gilayon nga gintawag ang atensiyon sang NFWM’s 3rd Boat Attack Division based sa Naval Station Juan Magluyan sa Panglima Sugala, Tawi-Tawi.
Nakaangkon sang minor injuries ang apat ka narescue kag nagpasalamat sa Navy nga nagsalbar sang ila kabuhi.