Ginkumpirmar ni PLT Joven Mogato sang Bacolod City Police Office City Drug Enforcement Unit (BCPO-CDEU) nga konektado sa dalagko nga personalities sa syudad ang 21-anyos nga lalaki nga nakuhaan sang masobra P1 milyon nga balor sang ginasuspetsahan shabu sa ginpatigayon nga buy-bust operation sa Purok Kahirup, Brgy. Singcang-Aiport, sa syudad sang Bacolod sang gab-i sang Lunes, Agosto 15.
Ginkilala ang suspetsado kay Jeboy James Bulaclac, alyas “Boy”, 21-anyos nga residente sang Purok Lamperong, Brgy. 2, sa syudad sang Bacolod kag ginakabig nga High Value Individual (HVI).
Nakumpiskar sa suspek ang duha ka pinutos kag 16 ka sachets ukon mga pakete sang ginasuspetsahan shabu nga ginabulubanta nagabug-at sang 206 ka gramos kag nagabalor sang P1,400,800.
Nakahunong sa Bacolod City Police Station 8 ang suspek nga nagapang-atubang sang mga kaso sa paglapas sa R.A. 9165 ukon ang Comprehensive Dangerous Drugs Act of 2002.
