Tuesday, December 6, 2022

22-anyos nga lalaki gina-alegar gin-abduct sang walo ka mga armado nga nagpakilala katapo sang NBI kag CIDG sa Talisay; biktima nakit-an sa Pontevedra

- Advertisement -

Gina-alegar gin-abduct ang 22-anyos nga lalaki sang walo ka armado nga nagpakilala bilang katapo sang National Bureau of Investigation (NBI) kag Criminal Investigation and Detection Group (CIDG) sa Banga Hiyang Hiyang, Barangay Kabatangan, sa syudad sang Talisay takna las 10 sang aga sadtong Martes, Nobyembre 22.

Ginkilala ang biktima nga si April Boy Gamayo alyas “Jordan”, may live-in partner kag residente sang banwa sang Moises Padilla, Negros Occidental.

Suno sa himata ni Gamayo, ginpuwersa nga ginsakay ang biktima sa salakyan sang mga armado nga lalaki nga nagpakilala bilang katapo sang NBI kag CIDG bitbit ang warrant of arrest nga gikan pa sa banwa sang Isabela.

- Advertisement -

Ginsiling sang mga suspetsado nga nakig-angut sila sa Talisay Police kag may nagahulat nga back-up sa babaw sang Campuestohan Highland Resort.

Apang indi sa gihapon kumbinsido ang mga himata sang biktima rason nga gintayaan sila sang armas-luthang sang mga suspetsado kag ginpahog nga pagakuhaon sila tanan kun indi sila magpasugot nga dal-on nila si Gamayo.

Bangud diri, nagpasugot na lamang ang himata sang biktima, apang ginpa-upod nila ang menor de edad nga live-in partner ni Gamayo sa salakyan samtang ginsundan naman nila ini sakay sang motorsiklo.

Sa tuman nga kadasigon sang salakyan sang mga suspetsado, wala na nila ini nasundan kag nagpadulong na lamang sila sa Talisay City Police Station agud i-verify kun nakahunong sa ila nga istasyon ang biktima.

Suno sa desk officer sang Talisay CPS, wala sang may natabo nga ‘coordination’ kag wala sila sang blotter report nga nabaton angut sa pag-arestar sa biktima.

Sandig naman sa CIDG Negros Occidental, wala sila sang report nga nabaton angut sa gindakup sa Talisay kag wala man ang pangalan sang biktima sa ila nga rekord.

Bangud diri, gintawgan nila ang cellphone sang biktima kag nagsabat ang live-in partner ni Gamayo kag nabatian nila nga nagasinggitan ini tigayon nga napatay ang tawag kag indi na nila ma-contact.

Apang, nahibaluan nga ginbilin sang mga suspetsado ang live-in partner sang biktima sa karsada sang Barangay Cabug, sa syudad sang Bacolod sadtong Nobyembre 22, las 7 sang gab-i.

Apang kaina sang aga sini nga Miyerkules, Nobyembre 23, nakit-an ang biktima nga nagalakat-lakat sa banwa sang Pontevedra.

Sa karun, yara sa maayo na kahimtangan ang biktima kag ang live-in partner sini.

Padayon naman ang imbestigasyon sang Talisay CPS angut sa nagluntad nga insidente agud makilal-an ang mga suspetsado kag mahibaluan ang motibo sa pag-abduct sa biktima.

- Advertisement -
Reyster Gani
Reyster Gani
News Writer /News Reporter at Radyo Bandera Sweet FM Bacolod. BS Mass Communication Graduate at University of Negros Occidental-Recoletos

Related Articles

Leave a Reply

Stay Connected

- Advertisement -

Latest Articles