Naglab-ot na sa 22 tanan ka mga persona ang nagkalamatay sa isa ka lugar sa pungsod Venezuela, matapos nga naglaslas si Hurricane Julia kag nagbubu ang mabaskog nga ulan.
Magluwas sa 22 nga nabawian sang kabuhi, masobra sa 50 pa gid ka mga persona ang padayon nga ginapangita sang kapulisan, kasunod sa nagluntad nga landslide.
Suno sa mga opisyal, nag-awas ang tubig sa suba kag halos napuno sang tubig baha ang mga puluy-an nga ginsundan pa gid sang “landslide”.
Kalakip sa mga nahalitan amo ang mga residente sang Las Tejerias sa Aragua state.
Magluwas sa mga puluy-an, nahalitan man ang mga establisemento kag negosyo nga halos napuno sang lunang kag debris.
Nakit-an man sa palibot ang naanud nga mga kahoy, kagamitan sa puluy-an kag mga salakyan.
Mismo ang mga residente, nagabulig na sa pagkutkut sang duta agud makita ang ila mga himata nga “missing”.
Sang tinalikdan nga Agosto, 15 man ka mga persona ang nagkalamatay matapos nga nagbubu ang mabaskog nga ulan nga nagresulta sa “mudslide” kag rock slides.
Isa man ka daku nga landside ang nagluntad sang tuig 1999 sa pungsod Venezuela nga nagresulta sa kamatayon sang 10,000 ka mga persona sa Vargas state, sa norte nga bahin sang Caracas.
