Dead-on-arrival sa Cauayan District Hospital sa banwa sang Cauayan, Negros Occidental ang 27-anyos nga lalaki matapos makaangkon sang mga buno-buno sa lawas.
Ginpabalo sang ospital ang Cauayan Police Station kaina las 2:30 sang aga, Domingo, Abril 23, 2023 nga may yara sang biktima sang stabbing incident nga gindala sa ila.
Ginkilala ang biktima kay Ronaldo Alisoso, 27-anyos, residente sang Purok 7, Barangay Isio sa banwa sang Cauayan, base sa spot report nga ginpadala sa Negros Occidental Police Provincial Office.
May buno si Alisoso sa iya dughan kag tyan.
Sa imbestigasyon sang Cauayan Police Station, gindul-ong lamang ni alyas “Maoy” si Alisoso sa tyangge sa Sitio Gabok, Brgy. Isio kung diin yara nagapungko sanday Romark Alisoso kag Jastine Ginega.
Ginsugo ni alyas “Maoy” si Romark kag Jastine nga dal-on ang biktima sa ospital sakay sang ila tricycle.
Padayon pa ang imbestigasyon sang kapulisan sa posible nga pag-identify sa mga suspek.*
