Magatiner sa bilangguan tubtub nagakabuhi ang anay hepe sang Tayabas Police starion sa probinsya sang Quezon, kag duha pa ka mga pulis, matapos ginsentensyahan sang korte nga “guilty” sa kaso nga pagpatay.
Ginkilala ang tatlo ka mga pulis nga sanday anay Tayabas City Police Station chief Police Colonel Mark Joseph Laygo, Police Corporal Lonald Sumalpong, kag Patrolman Roberto Legaspi.
Nagpangatubang sang kaso nga double murder ang tatlo ka mga pulis bangud sa kamatayon nanday Christian Gayeta kag Christopher Manalo.
Si Gayeta amo ang anak sang anay alkalde sang Sariaya, Quezon kag si Manalo naman amo ang security escort ni Gayeta.
Marso tuig 2019, sang ginpatay ang duha ka mga biktima.
Base sa report sang mga otoridad, nagresponde ang tatlo ka mga pulis sa ginhimo nga pagpanghold up sang duha ka mga lalaki nga nagasakay sa motorsiklo sa isa ka gasolinahan.
Ginpagwa man sa report sang mga otoridad, nga nagbatu ang duha ka mga lalaki gani nagluntad ang shootout kag napatay ini sang mga pulis.
Nahibaluan nga anak sang anay alkalde ang napatay nga si Gayeta kag security escort sini nga si Manalo.
Ginpatigayon sang National Bureau of Investigation okon NBI ang imbestigasyon kag diri nahibaluan nga napatay sanday Gayeta kag Manalo sa kustodiya na sang mga pulis.
Ginkalipay sang pamilya Gayeta ang nangin sentensya sang Lucena City Regional Trial Court sa kaso.*
