(Hungod nga wala ginhingadlan ang biktima kag purok bangud sensitibo ini nga balita.)
Ginbawian sang kabuhi ang 30-anyos nga lalaki matapos gina-alegar naghikog sa ila mismo nga balay sa isa ka purok sa Barangay Agpani, banwa sang Calatrava, takna las 8 sang gab-i, Domingo, Mayo 21.
Sa report sang Calatrava Municipal Police Station, takna las 8 sang gab-i sang nasapwan sang amay ang biktima nga nagabitay na sa sulod sang ila balay gamit ang higot.
Gilayon naman ginpapanaog sang amay ang iya bata halin sa pagkabitay agud masalbar pa ini apang wala na sang senyales nga nagaginhawa pa ang biktima.
Takna las 10:30 kaina sang aga subong nga Lunes, Mayo 22 gindala naman ang biktima sa Calatrava Rural Health Unit para sa Medicolegal Examination kag para sa nagakaigo nga disposisyon.
Ginapanawagan sa mga persona nga naga-antos sang depresyon kag iban pa nga mga mental illness sa hunahuna nga mahimo nga magpalapit sa National Center for Mental Health (NCMH) pinaagi sa ila nga crisis hotlines: https://ncmh.gov.ph/index.php/contact.
Ginapangabay man sa publiko nga mangin sensitibo sa pagkomento.
