Patay ang 39-anyos nga mangunguma matapos luthangon sang wala pa nakilala-an nga gunman sa tubang sang iya duha nga menor de edad nga anak sa sulod sang ila puluy-an sa Masbate City sang Domingo, Hunyo 19, 2022.
Nakilala ang biktima kay Jonathan Almado Blancaflor, kasado, residente sang Purok Santol, Brgy. Victory sa nasambit nga ciudad.
Nakapalagyo naman ang suspek matapos matabo ang insidente.
Suno sa imbestigasyon, takna las 9:00 sang gab-e nagalantaw sang T.V. ang 12-anyos kag 13-anyos nga anak sang biktima sa ila salas sang gulyada nagsulod ang gunman sa ila puluy-an nga may dala sang 12 gauge shotgun.
Gintiro sang suspek ang biktima sa nagkalain-lain nga bahin sang iya lawas kag nakaagum sang madamo nga pilas nga gintunaan sang iya kamatayon.
Nakumpiskar sang kapulisan sa ginluntaran sang krimen ang basiyo sang bala sang 12 gauge shotgun.
