Ginpahayag sang Cebu Pacific nga apat pa nga local destination ang nagpahalog sang guidelines para sa mga bisita kag indi na kinahanglan magpakita sang negative RT-PCR o antigen test result.
Sa isa ka pahayag, gintumod sang airlines ang mga nasambit nga lugar nga amo ang Bohol, Cebu City, Mandaue City, kag Roxas.
Umpisa sang Oktobre 25, ang mga magabiyahe sa nasambit nga mga lugar ang kinahanglan lang nga fully vaccinated.
Sa Bohol, kinahanglan ipakita ang vaccination certificate halin sa vaxcert.doh.gov.ph imbis nga negative RT-PCR test result.
Kinahanglan man ang government-issued ID kag magkuha sang S-Pass approval.
Samtang sa Cebu City, dapat ipakita ang vaccination card nga may QR code kag valid ID with picture kag signature.
Kung wala sang QR code ang vaccination card, pwede mapakita sang official vaccination certificate nga halin sa local government unit concerned ukon vaccination certification nga halin sa Department of Health (DOH)-BOQ.
Sa mga pasahero nga patdulong sa Mandaue City, kinahanglan magpakita sang official vaccine card ukon vaccine certificate.
Sa mga magapadulong naman sa Roxas, ginabaton ang fully vaccinated person nga may valid ukon verified vaccination certificates kag approved travel coordination permits halin sa S-Pass.
