Warning: graphic content
CAUAYAN, NEGROS OCCIDENTAL – Patay na kag nagapaligo sa kaugalingon nga dugo ang isa ka 40-anyos nga lalaki sang nasapwan ini sa dalan sa Sitio Cansuing, Brgy. Elihan, banwa sang Cauayan pasado la-una sang hapon sang Domingo, Nobyembre 27.
Ginkilala ang biktima nga si Dante Quirante, 40-anyos nga residente sang nasambit nga lugar.
Samtang ginkilala ang suspetsado nga nakaupod pa sini inom nga si Moises Galvan Sr., 67-anyos nga residente man sang lugar.
Gilayon nga nagsungka ang suspek pagkatapos sini nahimo ang krimen pinaagi sa isa ka barangay kagawad.
Gin-aku sang suspek nga ginbuno sini ang biktima sa sulod sang iya balay.
Base sa inisyal nga imbestigasyon sang kapulisan, naga-inom ang suspek kag biktima sang makahulubog nga ilimnon sang hinali nga nangakig ang biktima kag ginguba sini ang lamesa sang suspek.
Didto na ginbuno sang suspek ang biktima nga naigo sa iya dughan kag iban pa nga bahin sang lawas.
Narekober naman ang gingamit sang suspek nga bolo nga may kalabaon nga 21 ka pulgada.
Gindala ang suspek kag gingamit sini nga bolo sa Cauayan Police Station para sa nagakaigo nga disposisyon.
