BACOLOD CITY – Makasarang nga maka parking ang 40 ka salakyan sa ibabaw kag 12 tubtob 15 naman sa idalom kun matapos na ang bag-o nga public market sang Barangay Sum-ag sa syudad sang Bacolod, nga proyekto ni Congressman Greg Gasataya.
Sa interview sang Radyo Bandera kay Punong Barangay Rodney Carmona sang Sum-ag, iya gin pahayag nga gina hingagaw na karon ang merkado nga matapos sa masunod nga bulan para makabalik na ang mga gin pang relocate nga mga vendors.
Suno pa kay Kapitan Carmona nga ang land area sang market ang naga takos sang 2,500 square meters. Kun makasaylo na sa bag-o nga merkado indi na pwede mag gwa ang mga vendors para mag plastar sang ila mga baligya, magluwas sa adlaw sang Martes ukon market day kay may mga transient vendors nga gikan sa iban nga lugar nga temporaryo nagabaligya sa Sum-ag.
Sa madumduman, gin sugdan sang tinalikdan nga tuig ang pag renovate sang merkado sang Granada kag gin tukod naman ang iya ka Banago nga may parehas nga pondo nga tig-16 Million Pesos apang ang sa Sum-ag public market ang gin pondohan sang 41 million pesos para sa renovation pinaagi kay Congressman Greg Gasataya.*
