MURCIA, NEGROS OCCIDENTAL- Ginhold-up ang 48-anyos nga babayi kag nakuha ang iya wallet kag plastic nga alkansya nga may unod nga kuwarta nga nagabalor P9,000 sa Purok Lacson, Barangay Pandanon Silos sa banwa sang Murcia, Negros Occidental takna las 5:11 sang aga sadtong Miyerkules, Agosto 17, 2022.
Ginkilala ang biktima kay Mercideta Turabilla samtang ginkilala naman ang suspek kay Joel Delos Santos, 60-anyos; lunsay residente sang Purok Balasyang 1, Barangay Minoyan sa nasambit nga banwa.
Suno sa Murcia Municipal Police Station, nagalakat ang biktima sang hinali ini ginpalapitan sang suspek, gintayaan sang kutsilyo kag nagdeklarar sang hold-up.
Nakuha sa biktima ang itom nga bag, grey nga wallet nga may unod nga kuwarta nga nagabalor P4,000 kag plastic nga alkansya nga may unod P5,000 nga cash.
Nakapalagyo naman ang suspek apang nakilal-an ini kag tigayon nga nadakpan sang mga kapulisan.
Narekober sa suspek ang cash nga nagabalor P300 kag P42 nga sensilyo.
Yara karun sa kustodiya sang Murcia Police Station ang suspek kag nakatalana nga pasakaan sang kaso nga robbery.
