Warning: graphic content
HINIGARAN – Pilason ang isa ka lalaki matapos ini ginlabo sang iya 79-anyos nga amay sa Sitio Linao, Brgy. Bato, banwa sang Hinigaran sang Biyernes sang aga, Disyembre 2.
Ginkilala ang biktima nga si Randy Gicana, 50-anyos samtang ang suspetsado amo ang iya amay nga si Steven Gicana, 79-anyos; lunsay mga residente sang nasambit nga lugar.
Base sa pahayag sang utod sang biktima, ginakay-o ni Randy ang tulungtungan sang iya nga manok sang nagguwa ang ila amay kag nagsinggit nga, “ngaa ginaguba mo ang balay? Layas kamo diri kay indi ni inyo ang balay!”
Didto na nagbinaisay ang mag-amay kag hinali nga nagkuha sang espading si Steven nga iya gingamit sa paglabo sa iya bata sang makapila ka bes.
Nahibaluan nga madugay na nga may di-paghangpangay sa tunga sang mag-amay.
Gindala ang biktima sa Hinigaran Medical Clinic samtang nakapalagyo naman ang iya amay.
Wala sang plano ang biktima kag ila pamilya nga magapasaka sang kaso batuk sa suspek.
