GUIHULNGAN CITY, NEGROS ORIENTAL – Ginkumpirmar sang Philippine Army nga napatay ang isa sa mga gina-alegar myembro sang New People’s Army sa engkwentro nga naglawig sang lima ka minutos sa Sitio Taluktok, Brgy. Sandayao, sa syudad Guihulngan kaina sang aga sini nga Miyerkules, Hulyo 20.
Ginkilala ang napatay nga si Pompeo Landesa, 54-anyos nga residente sang Sitio Dako nga imbolbado sa mga kaso sang murder kag paglapas sa RA 10591 ukon Comprehensive Firearms and Ammunition Regulation Act.
Nakumpiskar gikan sa rebelde nga grupo ang isa ka KG9 nga may magazine, isa ka magnum 357 nga may tatlo ka mga bala, isa ka granada, kag subersibo nga mga dokumento.
Nagluntad ang engkwentro samtang nagapatigayon ang mga soldado sang 62nd Infantry Battalion (IB) sang operasyon sa lugar pagkatapos makabaton sang reports halin sa concerned citizens nga ginakwartahan sila sang mga rebelde.
Ginapangita sa gihapon sang 62IB ang ginabulubanta apat pa ka gina-alegar myembro sang rebeldeng grupo nga nakapalagyo sa wala pa mahibaluan nga direksyon.
