TUMAUINI, ISABELA – Patay ang anom ka mga indibidwal nalakip na ang isa ka lapsag matapos mabungguan sang trailer truck ang kasugata sini nga tricycle kag motorsiklo sa banwa sang Tumauini, probinsiya sang Isabela sadtong Sabado, Agosto 27.
Suno sa imbestigasyon sang Tumauini Police, sundanay nga nagabiyahe ang tricycle kag motorsiklo sa national highway sa Barangay Balug sang mabunguuan sila sang kasugata nga trailer truck.
Halos mawasak ang tricycle kag motorsiklo sa nagluntad nga bungguanay samtang nagdiretso naman ang trailer truck sa tanuman sang mais sa higad sang dalan.
Dead-on-the-spot ang drayber sang motorsiklo nga ginkilala kay Kuldip Singh, 38-anyos nga residente sang Gamu, Isabela.
Ginbawian man sang kabuhi ang sakay sang tricycle, kalakip ang drayber nga si Arnel Menor, 37-anyos, iya asawa nga si Diana Rose, 36-anyos, ila anom ka bulan nga anak kag ang amay ni Diana nga si Ernesto, 71-anyos.
Gilayon naman gindala sa ospital ang asawa ni Ernesto nga si Elma, 64-anyos apang ginbawian man ini sang kabuhi.
Wala nasamaran ang drayber sang trailer truck apang ginkumpirmar sang doktor nga yara ini sa impluwensya sang makahulubog nga ilimnon.
Nagapangatubang ang drayber sang truck sang mga kaso nga reckless imprudence resulting in multiple homicide kag damage to properties.
