Naglab-ot sa 62.69 megawatts sang kuryente ang nakinot sang Pilipinas sa ginpatigayon nga Earth Hour 2023 sang tinalikdan nga Sabado.
Suno sa Department of Energy (DOE), ang Luzon ang may pinakamadako nga narecord nga electricity savings sang ginpatigayon ang isa ka oras nga switch off nga yara sa 33.29 MW.
Ginsundan man ini sang Mindanao nga may 20.5 MW kag Visayas nga may 8.9 MW.
Madumduman nga ginhiwat ang Earth Hour 2023 sadtong Sabado, Marso 25 kun sa diin dungan nga ginpatay sang mga Pinoy ang mga non-essential lights sa tunga sang las 8:30 sang gab-i tubtob las 9:30 sang gab-i.
Ginpangunahan ang paghiwat sang Earth Hour sang World Wildlife Fund, nga isa ka paagi sang mga tawo sa bug-os nga kalibutan agud makig-isa sa paghatag sang aksyon sa pila ka problema nga gina-atubang sang aton palibot.
Samtang, padayon naman nga nagapanawagan ang DOE sa publiko nga magkini sa paggamit sang kuryente, paagi sang pagpatay sang mga non-essential lights kag pagpili sang mga appliances nga mas energy efficient.*
