Nasapwan na lamang nga wala na sang kabuhi ang isa ka 62 anyos nga mangingisda samtang yara pa sa iya nga sakayan kag ini ang ginapatihan nga naigu-an sang kilat samtang naga panagat sa may baybayon nga sakop ka Brgy. Bulanon ciudad sang Sagay.
Mga takna alas-10 sang aga, Martes nga adlaw, Hunyo 21, 2022, nakabaton sang report ang Sagay City PNP angut sa nasambit nga insidente.
Gilayon nila nga gin kadtuan kag gin-usisa ang panghitabo kag nakilala ang biktima nga si Ernesto Baynas y Andojar, residente sang Sitio Datag sa nahinambitan man nga lugar.
Base sa panaysayon ka mga mananagat nga naka sapo sa bangkay sang biktima, possible nga natabo ang insidente mga takna las-7 sang aga samtang naga pangisda si tatay Ernesto.
Insigida ini nga gin report sa mga otoridad agud maimbestigaran.
Nakita sa parte sa lawas ka biktima nga ini ang may agi sang sunog nga gina patihan igo sang kilat, nalakip man nga may nakit-an nga sunog ang isa ka porsyon sang sakayan ka biktima.
Sa pihak sini, maga patigayon sa gihapon sang post mortem examination ang kapulisan sa bangkay ka biktima.*
