Ginpanginwala sang 62nd Infantry Battalion ang statement sang Leonardo Panaligan Command sang New People’s Army nga ila asset ang habal-habal driver nga ginluthang-patay sa Sitio Tubod Brgy. Macagahay sa banwa sang Moises Padilla Huwebes sang gab-i, Enero 19.
Sa interview sang Radyo Bandera Bacolod kay Lieutenant Colonel William Pesase, commanding officer sang 62IB, ginsiling sini nga indi matuod nga asset sang battalion ang ginpatay nga si Raffy Esturco, 28, kag residente sang nasambit nga lugar.
Suno kay Pesase isa lamang ini sa mga propaganda kag kabutigan sang NPA agud matabunan ang mga nadula sa ila sa mga nagliligad pa nga mga engkwentro.
Nahibaluan nga gin-ako sang NPA ang pagpatay sa biktima bangud suno sa ila isa ini ka masupog nga asset sang army sa lugar kag masami nga nagagiya sa mga operasyon sang militar sa boundary sang Guihulngan, Canlaon, kag Moises Padilla.*
By: Jinn Siatita
