Nadakup ang 8 ka mga lalaki nga katapo sang Alpha Kappa Rho (AKRHO) Delta Chapter fraternity nga gina-alegar imboldado sa hazing nga nagresulta sang pagkamatay sang isa ka criminology student sa syudad sang Davao sang Lunes, Setyembre 19.
Samtang, ginapangita naman ang 6 pa nga imboldado sa krimen matapos makapalagyo halin sa mga otoridad.
Suno sa Davao City Police Office (DCPO), nakabaton sila sang impormasyon nga may isa ka bangkay ang natukiban sa Upper Mandug, Buhangin Distric sa nasambit nga syudad matapos ginpatigayon ang gina-alegar hazing. Pilason naman ang isa pa ka estudyante bangud sa nagluntad nga insidente.
Nagpaguwa sang pahayag ang University of Mindanao nga may mga estudyante sila halin sa College of Criminal Justice nga imboldado sa nasambit nga hazing. Magabulig naman ang buluthuan sa imbestigasyon sang mga kapulisan.
Ginadumilian sang University of Mindanao ang tanan nga fraternity bangud sa layi nga Republic Act 8049 ukon anti-hazing law, kag wala nila ginakilala ang nasambit ng fraternity group kag mga iligal nga aktibidades sini.
Nagapangatubang sa kaso nga paglapas sa Anti-Hazing Law ang nadakup nga mga suspek.
