Pilason si Roland Figora Jr., alyas “Agi,” 42-anyos sang ini ang naluthangan sa Purok Sigay, Barangay 2 sa ciudad sang Bacolod, takna las 7:40 sang Huwebes sang gab-i, Abril 22, 2021.
Gindala si Figora sa Corazon Locsin Montelibano Memorial Regional Hospital samtang nakapalagyo ang suspek nga ginkilala kay Ben Rowen Asumbra, alyas “Bimbim,” kag residente sang Purok Kagaykay sa nasambit nga barangay, sandig sa report sang Bacolod Station 2.
Sandig sa imbestigasyon sang kapulisan, nagatindog si Figora sa balay ni Bobong Canlas sang ini ang ginkumpronta ni Asumbra may angut sa iya gin-alegar utang sa iligal nga droga kag ginluthang ini sang gin-alegar .38 calibre nga armas luthang.
Nakaangkon sang duha ka pilas sa paa si Figora.
Old grudge kag iligal nga droga ang ginalantaw motibo sa insidente.
Nagpatigayon naman sang hot-pursuit ang kapulisan sang Station 2.*
