Nakuhaan ang isa ka lalaki sang iligal nga druga sa ginpatigayon nga buy-bust operation sa Purok Marieta Village, Barangay Taloc, syudad sang Bago, Negros Occidental, sini nga Lunes sang hapon, Disyembre 5, 2022.
Ginkilala ang suspek kay Pebril Prado alyas “Dagol”, 26-anyos, may live-in partner, ginakabig Street Level Individual (SLI) kag residente sang Purok Newton sang nasambit nga barangay.
Sandig sa report, takna las 1:38 sang hapon, ginpatigayon sang Bago City Police, nga ginpangunahan ni Pltcol Joem Malong ang buy-bust operation batuk sa suspek.
Nakumpiskar sa suspek ang siyam ka pakete sang ginasuspetsuhan shabu, nalakip na ang buy-bust item nga nagabug-at sa isa ka gramos kag nagabalor sa P6,800.
Nakuha man ang isa ka lighter nga nagaduag violet, isa ka unit sang silver Redmi cellphone, isa ka unit sang motorsiklo nga Suzuki, P500 nga buy-bust money kag P810 nga cash.
Magapangatubang ang suspek sa kaso nga paglapas sa Section 5 kag 11 sang Republic Act 9165 ukon Comprehensive Dangerous Drugs Act of 2002.*
