Dakop ang isa ka lalaki sa ginpatigayon nga buy-bust operation sa Hacienda San Francisco, Brgy. Cubay, syudad sang La Carlota, takna las 2:50 sang hapon sini nga Biyernes, Marso 24.
Ginkilala ang subject kay Jomar Jalandoni y Guillermo alyas Jan-Jan, 39-anyos, wala sang obra kag residente sang CBC Paet, Brgy. Batuan sang nasambit nga syudad.
Nakumpiskar sa subject ang pito tanan ka pakete sang ginasuspetsuhan shabu, nalakip na ang buy-bust item, nga nagabug-at sang 5 ka gramos kag nagabalor sang P34,000.
Magluwas sa suspected shabu, nakuha man ang isa ka kahita nga nagaduag red kag blue, P500 nga buy-bust money, kag isa ka unit sang TC Rusi motorcycle nga nagaduag itom.
Yara na sa kustodiya sang La Carlota CPS nga magapangatubang sa kaso nga paglapas sa Republic Act 9165 ukon Comprehensive Dangerous Drugs Act of 2002.*
