TONDO, MANILA – Patay ang isa ka lola samtang pilason naman ang mag-iloy sang ginbuno-buno sila sang ila padre de pamilya bangud indi ini mabaton ang pagkamatay sang iya anak nga lalaki samtang nakahaya ini sa Tondo, Manila sang Martes, Hulyo 26.
Ginkilala ang napatay nga biktima kay Emedina Nabua, 69-anyos nga tag-iya sang sari-sari store samtang yara naman sa Jose Reyes Medical Center ang pilason nga mag-iloy sanday Jennifer Coquilla kag Ryza Conquilla, 3-anyos nga lunsay residente sang Dagupan Extension, Tondo, Manila.
Gindakup naman sang kapulisan ang suspek nga si Aries Coquilla, bana kag amay sang mga biktima nga si Jennifer kag Ryza.
Sandig sa inisyal nga imbestigasyon sang kapulisan, naghangkat sang away ang suspek bangud indi sini mabaton ang pagkamatay sang iya 16-anyos nga anak.
Nagkuha ini sang patalom kag ginbuno-buno ang iya mag-iloy samtang ginsulod niya man ang tiyangge kag ginbuno-buno niya ang tigulang nga ginbawian sang kabuhi.
Nagsungka naman ang suspek nga naga-atubang sa kaso nga homicide, 2 counts sang frustrated parricide kag alarm and scandal.
