Wala mapunggan ang paghilibion sang mag-amay nga sanday Ariel Cahilig kag Reyna Joy Alunan sang sila ang liwat nga nagkitaay, matapos ang 20 katuig.
Nagpadala sang mensahe si Reyna Joy sa Facebook page sang Pontevedra Police Station sang Pebrero 22, 2021, agud mangayo sang bulig nga makit-an ang amay sini nga si Ariel Cahilig, nga sa iya ulihi nga nahibal-an, ang nagapuyo sa Barangay Antipolo sa banwa sang Pontevedra, Negros Occidental.
Suno kay Reyna Joy, nga karon yara na naga-istar sa ciudad sang Talisay, Negros Occidental, nga baby pa lang ini kag ang iya isa ka utod nga lalaki sang nagbulagay ang ila mga ginikanan.
Ini ang rason nga wala pa makita ni Reyna Joy ang amay sini.
Paagi sa “Pulis sa Barangay” nga na-assign sa Barangay Antipolo nga si P/Cpl. Ronald Estoria kag mga BPATs, ila ginpangita ang nasambit nga persona kag tigayon nga nakit-an si Tatay Ariel sa Sitio Colonia, sakop sang Barangay Don Salvador Benedicto sa Pontevedra sang Pebrero 25, 2021.
Kag sang Lunes, Marso 1, gin-updan sang mga katapo sang Police Community Relation Section sang Pontevedra Police Station si Reyna Joy agud makadtuan ang iya nga amay.
Isa ka hugot nga hakos ang ginsugata ni Tatay Ariel sa iya sini bata nga si Reyna Joy, nga wala naman napunggan ang paghilibion.*
