CALIFORNIA, USA – Naglibog ang ulo sang mga otoridad sa California, USA matapos nakabaton sang tawag sa ila emergency hotline nga 911 bangud wala nagatingog ang nagtawag kag hinali nautod ang linya sadtong Agosto 13.
Sang gin-imbestigahan ang tawag, natukiban nga naghalin ini sa isa ka zoo sa Paso Robles.
Ginpakadto sang dispatchers ang kapulisan sa zoo kag nahibaluan nga isa ka Capuchin monkey nga si “Route” ang nag-dial sa 911.
Yara naman si Route sa pagtatap sang Conservation Ambassadors Zoo to You.
Madumduman sadtong tuig 2019, nagresponde ang mga otoridad sa isa ka insidente kun diin isa ka amu ang nang-“hostage” sang isa ka empleyado sa bangko sa India.
Nagpungko ang amu sa likod sang lalaki kag ginapahog sini ang mga nagapalapit sa ila.
Wala man gindetalye kun paano nakasulod ang nasambit nga amu sa bangko apang naguwa man ini matapos ang pila ka minutos.
