SAGAY CITY – Dead-on-the-spot ang isa ka anay priso matapos ginluthang sang ‘riding in tandem’ sa dalan Marañon, Brgy. Poblacion 2, sa siudad sang Sagay pasado las sais sang gab-i sang Huwebes, Setyembre 29.
Ginkilala ang biktima nga si Jojo Matarong, residente sang Brgy. Dian-ay sa siudad sang Escalante, kag nagamaneho sang motorsiklo nga Rusi Rango 125 sang nagluntad ang pagpangluthang.
Nakaangkon ang biktima sang lima ka mga igo sang bala sa nagkalain-lain nga bahin sang iya lawas samtang lima man ka mga basiyo sang wala pa matumod nga kalibre sang armas-luthang ang narekober sa crime scene.
Nahibaluan nga bag-o lamang nakaguwa sa prisohan ang biktima, suno sa iya pamilya.
Nasalabat sa pagpangluthang ang isa ka 56-anyos nga babayi nga naigo sa iya nga batiis samtang nga naga-angkas sa isa man ka motorsiklo.
Base sa inisyal nga impormasyon, nagasakay ang mga suspek sa motorsiklo nga Yamaha Aerox nga nagaduag sang orange kag gilayon nga nagpalagyo ang mga ini sa wala pa mahibaluan nga direksyon.
Ginalantaw nga posible may kaangtanan ang pagpangluthang sa mga atraso sadto sang biktima apang nagapadayon ang imbestigasyon sang kapulisan agud makilala ang mga suspek kag mahibaluan ang ila motibo.
