BACOLOD CITY – Apisar nga masami ginatunaan sang aksidente, lakip ang kamatayon sang 5-anyos nga bata sang Marso sang tinalikdan nga tuig 2022, wala sa gihapon sang baral ukon ano man nga safety measure sa malapad nga kalog sa bahin sang Hillside Subdivision, Brgy. Mansilingan, sa siudad sang Bacolod.
Marso 14 sang tinalikdan nga tuig, nahulog sa nasambit nga kalog ang 5-anyos nga si alyas Boyboy kag naanod ini sang tubig nga dala sang mabaskog nga ulan.
Gintinguhaan sang mga residente kag sang rescue team nga masalbar ang bata apang mayami na ini nga bangkay sang nakit-an nga nasangit sa mga kabilya sa kalog.
Pagkatapos sang isa ka tuig, sini nga Marso 14, 2023, ginadumdum ang una nga anibersaryo sang kamatayon ni alyas Boyboy kag magasindi kuntani sang kandila ang lola kag pamilya sa lugar.
Natingala ang lola bangud wala sa gihapon sang baral agud malikawan nga may maaksidente ukon mahulog sa kalog.
Suno sa iloy sang bata nga isa ka overseas Filipino worker (OFW), ikatatlo na ang iya bata nga napatay bangud sa nasambit nga kalog.
Nagapanawagan ang iloy sa barangay kag kay Mayor Albee Benitez nga matabunan ukon mabutangan sang baral ang kalog.
“Ngaa subong wala naman baral ang kalog nga gindagdagan sang bata ko? Sakit batchagon nga halinan sa dira nga kalog napatay akon bata kag wala aksyon nga mabaralan nga wala liwat sang may maaksidente,” pabutyag sang iloy.
