Nagapadayon ang imbestigasyon batuk sa apat ka mga doktor sa probinsya nga ginareklamo sang mga pasyente bangud sa gina-alegar nga “malpractice” kag “maltreatment”, suno kay Atty. Rayfrando Diaz, Provincial Administrator sang Negros Occidental.
Suno kay Atty. Diaz, yara na sa Provincial Legal Office (PLO) ang kaso batuk sa apat ka doktor apang wala pa ini sang nabaton nga update angut sa dalagan sang imbestigasyon.
Ginpaathag man ni Atty. Diaz nga nasugudan na ang imbestigasyon kag ginahatagan sang tion ang mga doktor nga magsabat sa mga akusasyon batuk sa ila.
Ginklaro man ni Atty. Diaz nga indi mahimo sang PLO nga magpatigayon sang nagakaigo nga hearing kag proceedings angut sa administration charges batuk sa health workers, sa idalum sang Section 11 sang Republic Act 7305 ukon Magna Carta of Public Health Workers.
Suno kay Atty. Diaz, may ara sang kaugalingon nga board ukon committee nga nalakipan sang mga doktor, kasubong sang Provincial Health Officer, kag magasumiter ang kada myembro sang committee sang ila nga findings sa Health Secretary, trenta (30) ka adlaw pagkatapos sang hearing.
Madumduman nga ginpabutyag ni Atty. Diaz ang iya pagkadismaya sang iya mahibaluan nga nakalab-ot na sa Department of Health (DOH) ang mga reklamo batuk sa apat ka mga doktor sa probinsya.
Ginapasiguro naman ni Atty. Diaz nga magapang-atubang sang sanction ang sin-o man nga mapamatud-an nga “guilty” sa alegasyon batuk sa ila.
