Nagresulta sa pagkapatay sang apat kag pagsungka sang duha ka mga miembro sang New People’s Army (NPA), ang nagluntad nga engkwentro sa Sitio Cambawgon, Brgy Trinidad, siudad sang Guihulngan, Negros Oriental, takna las 5:10 sang kaagahon, Domingo, Mayo 21, 2023.
Suno sa 62nd Infantry Battalion, naglawig sang 20 ka minutos ang engkwentro antes mag-isol kag magdalagan ang mga rebelde padulong sa naaminhan nga direksyon.
Sa karon wala pa sang identity ang napatay kag nagsungka nga mga NPA.
Narekober sa ginluntaran sang engkwentro ang isa ka M4 Firebird, tatlo ka M16, isa ka cal. 30 springfield bar rifle, tatlo ka cal. 45 pistol, pito ka short magazines sang M16, tatlo ka long magazines sang M16, apat ka magazines sang cal .45, isa ka magazine sang cal.30, 88 ka bala sang M16, 42 ka bala sang cal. 30, 22 ka bala sang cal .45, apat ka rifle grenades, isa ka hand grenade, isa ka ied, isa ka detonating cord, isa ka binocular, lima ka backpacks, kag personal nga mga gamit.
Nagapanawagan naman ang 62IB sa mga nakapalagyo nga mga rebelde ilabi na ang mga nasamaran nga miembro sang NPA nga magsungka na agud mahatagan sang nagakaigo nga medikal nga atensyon.
Naghatag sang tsansa ang gobyerno sa mga rebelde nga magsungka na ang mga ini bangud indi maga-untat ang 62IB nga lagson kag pangitaon sila agud mapabilin lamang ang kalinungan sa Central Negros.*
