Nagresulta sa kamatayon sang apat ka persona, pagkapilas sang tatlo kag pagkadakop sang apat ka mga indibidwal ang engkwentro sa tunga sang mga katapo sang Special Action Force kag ginapatihan armado nga mga New People’s Army sa Sitio Balik-Balik, Barangay Tabu, banwa sang Ilog, Negros Occidental, kaina sang aga, Setyembre 14, 2021.
Suno kay P/Lt. Col Ryan Manongdo, battalion commander sang 6th Special Action Battalion PNP-Special Action Force, apat ka mga lalaki ang patay sa engkwentro, samtang duha ka ginapatihan rebelde – isa ka lalaki kag isa ka babayi ang pilason.
May nakaangkon naman sang minor injury sa isa ka katapo sang PNP.
Samtang, apat naman ka mga persona ang arestado kag yara na naka-detain sa custodial facility sang Ilog Police Station.
Naglawig sang isa ka oras kag 10 ka minutos ang pagbayluhanay sang lupok.
Suno kay Manongdo, 30 tubtob 40 ka mga armado nga rebelde ang ila naka-engkwentro. Nangayo man ang tropa sang SAF sa 2nd Negros Occidental Provincial Mobile Force.
Apat ka mga long firearms (duha ka M16, M14 kag AK47), isa ka revolver, grenade launcher, explosives kag mga bala ang ang nakuha sa encounter site.
Yara sa ospital ang mga nasamaran kag ginabantayan sang otoridad.
Wala sang sibilyan nga nasamaran sa engkwentro.
Gina-verify pa man sa karon sang otoridad kung may yara sang nasalabat nga karbaw agud mahimo mabuligan ang tag-iya sini.*
