Tuman ang kaakig sang pamilya ni Mary Jane Plaza, estudyante sang Aklan State University Banga Campus kag maga-gradwar bilang cum laude sa Hulyo 11 matapos nabuka ang iya bagol bangud lang sa hubog nga lalaki.
Kritikal karon ang kondisyon ni Mary Jane sa Panay Hospital bangud sa dako nga pilas sa iya ulo kag nagalab-ot sa P700,000 ang operasyon.
Nahibaluan nga papauli na kuntani si Mary Jane sa Boracay matapos magtambong sa graduation sang iya utod, sang hinali nalang ginhampak sang hubog nga lalaki ang ila ginasakyan gamit ang hollow block nga naglusot sa salakyan.
Wala na sang amay si Mary Jane kag bag-o lang nakarekober ang iya iloy sa stroke rason nga tuman ang pamroblema sang iya pamilya kung sa diin makakuha sang kwarta bangud bisan P250,000 nga downpayment sa hospital, yawan gid sila pangita.
Nadakpan naman sang kapulisan ang suspek apang nagpahayag nga wala na siya makadumdom sang iya ginhimo bangud sa tuman nga kahulugbon.
Sa Hulyo 11 nakatalana ang graduation ni Mary Jane nga magatapos sa kurso nga BSED major in Mathematics.
