Naglumpat na lamang halin sa ginasakyan nga tricycle ang isa ka babayi matapos ini gindala sang drayber sa sala nga ruta sa dalan E. Solas, Greenplain 2 Subdivision, Barangay Singcang Airport, sa syudad sang Bacolod takna las-9:30 sang gab-i sang Lunes, Agosto 29.
Ginkilala ang biktima kay Mary Rose Oquindo, 26-anyos nga residente sang Purok San Roque, Barangay Tangub, sa nasambit nga syudad.
Suno sa Bacolod City Police Station 8, magapauli na kuntani si Oquindo sa iya puluy-an halin sa iya trabaho kag nagsakay ini sa tricycle nga may temporary plate number nga 0601-0943785 nga ginamaneho sang wala pa nakilal-an nga suspek.
Sang naka-abot na ang tricycle sa dalan Alijis-Murcia pakadto sa Bangga Good Year sa Barangay Singcang-Airport, natukiban ni Oquindo nga sala ang gin-agyan nga dalan sang drayber.
Ginpauntat ni Oquindo ang tricycle agud manaog na ini apang padayon sa gihapon nga nagabiyahe ang drayber.
Sang magaliko na kuntani ang tricycle sa dalan E. Solas, didto na naglumpat si Oquindo halin sa tricycle kag nagtabog sa dalan.
Nakabatyag naman ang biktima sang kahadlok kag naka-agum ini sang injury sa nagkalain-lain nga bahin sang iya lawas.
Nagapadayon naman ang imbestigasyon sang kapulisan agud madakup ang suspek.
