BACOLOD CITY– Nagapadayon ang imbestigasyon sang Bacolod City Good Governance Committee batuk sa heavy equipment sang Department of Public Services (DPS) nga ginatughungan sang anay administrasyon bisan unserviceable ukon indi na magamit.
Nagtuhaw ang nasambit nga isyu sang gin-presentar ni Mayor Albee Benitez sa iya nga speech sa ginpatigayon nga 1st 100 Days Accomplishment Report sang Biyernes, Oktubre 7.
Sa interview sang Radyo Bandera kay Atty. Pacifico Maghari III, Bacolod City Administrator iya ginpahayag nga nagapadayon pa ang imbestigasyon apisar nga may ginpadala na nga Show Cost Order sa duha ka empleyado sang DPS.
Dugang pa ni Atty. Maghari nga kun makita-an na sang grounds ang duha ka empleyado sang DPS, dira na masulod ang formal charge kag posible preventive suspension.
Sa karon wala pa ma-disclose ang pangalan sang duha ka empleyado nga imbolbado sa pag-aprobar sang transaksyon nga hatagan budget kag tughungan sang krudo ang unserviceable heavy equipment sang DPS bangud padayon pa ang imbestigasyon.
Ginabulubanta nga sa bulan sang Disyembre, 2022 may resulta na ang imbestigasyon suno sa City Administrator.*
