Patay ang bag-o bun-ag nga lapsag nga lalaki matapos gin-alegar ginkuga kag gintago sa cabinet sang iya 21 anyos nga iloy nga nagatrabaho bilang caregiver sa isa ka subdivision sa Barangay Baybay, Roxas City.
Suno sa imbestigador sang Roxas City PNP, nga indi luyag sang suspetsado nga mahibaluan sang iya ginhikanan kag ginatrabahuan nga nagabusong ini rason nga iya ginpatay ang iya bag-o bun-ag nga lapsag kag gintago sa cabinet nga ginatrabahu-an nga balay.
Natukiban nalang nga nagbata na ang nasambit nga iloy matapos magduda na ang iya amo sa iya nga kondisyon
Samtang, nakumpirmar sa ultrasound sa hospital nga nakabun-ag na ini rason nga gilayon ginpangita kung sa diin gintago ang lapsag sang suspetsado.
Bangud diri, gin-aku na sang iloy nga iya gintago ang lapsag sa cabinet kag nasapwan nga wala na sang kabuhi.
Base naman sa post mortem examination, “asphyxia by strangulation” ang rason sang pagkamatay sang lapsag.
Sa karon, napasakaan na sang panumbungon ang suspetsado nga Infanticide kag nagapabilin nga naka hospital arrest matapos nagmato-mato pabata sa iya kaugalingon.
