Duha ka mga kaso sang makamamatay nga Marburg virus nga kaangay sang Ebola ang natukiban sa Ghana sa West Africa, base sa anunsyo sang health authorities sang Domingo, Hulyo 17.
Ginkumpirmar sang Pasteur Institute sa Senegal nga positibo sa Marburg virus ang blood samples sang duha ka residente sang southern Ashanti.
High fever ukon hilanat ang isa sa mga sintomas sang Marburg kaangay sang COVID-19 apang posible maka-eksperyensya ang mga positibo sa Marburg sang hinali nga pagsakit sang ulo kag internal kag external bleeding.
Nagdangat sa 98 ang natumod nga close contacts sang duha kun diin ginapaidalum na ang mga ini sa quarantine.
Wala pa sang vaccines ukon treatment para sa nasambit nga virus.
Nahibaluan nga posible man maglapta ang virus pinaagi sa ‘infected’ nga mga kasapatan pareho sang kabog.
“This is the first time Ghana has confirmed Marburg Virus Disease,” pahayag ni Ghana Health Service (GHS) Head Patrick Kuma-Aboagye.
via AFP
