MURCIA – Base sa inisyal nga pahayag sang Scene of the Crime Operatives (SOCO), wala sang pilas sa lawas kag posible nga napatay pinaagi sa pagkuga ang bangkay nga nasapwan sa sulod sang sako sa isa ka tamburong sa Brgy. Damsite sa banwa sang Murcia.
Suno kay Police Major Marc Joeil Reclamado, hepe sang Murcia Municipal Police Station, ginahulat pa nila ang resulta sang autopsy agud matumod ang gintunaan sang kamatayon sang biktima.
Dugang pa ni PMaj. Reclamado, wala sa gihapon makilala ang biktima nga nasapwan sang Biyernes, Marso 31, kag wala man may nagpalapit sa ila agud pangitaon ang biktima.
Bangud sa wala pa makilala ang biktima, indi makapadayon sa imbestigasyon ang kapulisan.
Nagapanawagan man ang Murcia MPS nga makipag-angut sa ila kun may ‘missing’ nga pamilya ukon himata.
Ang biktima amo ang lalaki nga gamayon ang panglawason, may ginabulubanta nga kataason nga 5’6, kag edad nga 30 tubtob 35-anyos.
WATCH: Pagkuha sang bangkay sa sulod sang tamburong.
