Gindul-ong na sa iya katapusan nga palahuwayan ang 5 anyos nga babayi nga naanod sa suba sa Brgy. La, Granja, La Carlota City matapos masapwan kaina sang aga Hunyo 9 sa Brgy. RSB sa amo man nga syudad.
Domingo nga adlaw, Hunyo 6 sang nareport nga naanod ang bata nga si Mary Rose “Pulay” Cadenas nga nagtabok sa suba kaupod ang iya iloy kag duha katuig nga utod.
Suno sa iloy ni Pulay nga si Rosario Cadenas, wala niya na-antisipar nga mangin mabaskog ang tubig suba.
Suno kay Rosario, wala niya masarangan ang kabaskog sang tubig amo nga kinahanglan niya unahon tabok ang iya duha katuig nga bata kag ginbilin sa isa ka bato si Mary Rose agud balikan.
Apang antes pa man makabalik si Rosario, nakit-an na lamang ini nga naanod na ang iya bata nga si Mary Rose.
Gintinguhaan man gilayon sang mga residente nga buligan ang mag-iloy kag si Mary Rose nga gina-anod na sang baha apang napaslawan ang mga ini bangud sa kabaskog sang tubig suba.
