RBSFM NEWSCENTER – Nasapwan sang mga mangigisda ang bangkay sang isa ka lalaki nga naga utaw-utaw sa lawud malapit sa boundery sang Buenavista, Guimaras kag Negros Island kaina sang aga.
Sa interview sang Radyo Bandera Bacolod sa kay Charlie Chavez kag Joey Sanchez, 33 anyos, lunsay residente sang Barangay Sum-ag, ciudad sang Bacolod, ila nakit-an ang naga utaw-utaw nga bangkay samtang sila ang naga panagat sakay sa motorized banca.
Sa ila kalooy sa biktima, sila ang nag disisyon nga dal-on na lamang sa Bacolod ang bangkay gani ila ini gin higtan sang pisi sa tiil kag gin guyod padulong sa Barangay Sum-ag.
Ang biktima ang wala pa makilala. Wala man sang panapton. Ini ang gina bulobanta 5 feet ang kataason, small built, kag may malaba nga buhok. Ini ang medyo nag habok bangud nga ini ang yara nag tinir sa tubig.
Nakig-angot man ang Radyo Bandera Bacolod sa Nueva Valencia PNP kag tigayon nga ma interview ang Chief Investigator nga si Police Chief Master Sergeant Orlando Castellano. Suno sa kay PCMSGT Castellano, sang damlag pa, may yara sang isa ka tawo nga nag report nahanungod sa ila missing nga himata gani ini sa karon ang gina tinguhaan nga malab-ot sang Nueva Valencia pulis agud ma sekyar kun bala ang nasawpwan nga bangkay sa tunga sang lawud, amo ang nadula nila nga himata.
Sa karon, padayon pa ang pag proceso sang mga katapo sang PNP Scene of Crime Operation (SOCO) sa nasambit nga bangkay agud mahibaloan kun bala may yara sang foul play sa kamatayon sang biktima.
