Ginkumpirmar ni Negros Occidental Governor Eugenio Jose Lacson nga wala pa sang sabat si Cebu Governor Gwendolyn Garcia sa iya pangabay nga hatagan sang pahanugot ang mga hog raisers gikan sa Negros Occidental nga makaagi pakadto sa probinsya sang Leyte agud magdul-ong sang ila mga baligya nga baboy.
Bangud sini, suno kay Lacson napilitan ang mga hog raisers sang probinsya nga sa Metro Manila kag iban pa nga bahin sang Luzon na lamang magpadala sang ila mga produkto nga baboy.
Sandig sa datos sang Provincial Veterinary Office, sumugod Marso 7 sini nga tuig, nagdangat na sa 1,100 ka bilog ka buhi nga baboy ang napadala sang mga hog raisers halin sa probinsya padulong sa Metro Manila.
Apang ginpahayag sang Gobernador nga sandig sa nakalab-ot sa iya nga impormasyon, mas manubo sang 20 pesos kada kilo ang presyo sa Luzon kumpara sa presyo sang baklanay didto sa probinsya sang Leyte.
Gindugang pa ni Lacson nga mas maayo na lamang ina kaysa indi sila makabaligya.
Ginalantaw man sang probinsya ang posibilidad nga iga-agi na lamang sa Dumaguete Port pakadto sa Dipolog Port ang mga baboy para sa mga manugbakal sini sa Leyte apang magadako naman ang transportation cost sang mga hog raisers.
Nahibaluan nga nagapatuman sang banning ang probinsya sang Cebu sa mga pork products kag iban pa nga mga produkto gikan sa baboy halin sa Negros Occidental bangud sa alegasyon nga ang mga baboy gikan sa probinsya ang kontaminado sang African Swine Fever (ASF).
Samtang sa pihak nga bahin, matapos nga ginkumpirmar sang Department of Agriculture (DA) nga may positibo nga kaso sang ASF sa Cebu gilayon nga nag isyu sang Joint Executive Order ang Probinsya kag siyudad sang Bacolod agud pagadumilian ang pag sulod sang mga pork products gikan sa Cebu kalakip na ang mga baboy gikan aa Bantayan kag Camotes Island.
Nalakip naman sa banning sang amo nga EO ang mga pork products gikan sa Luzon, Mindanao, Eastern Visayas, Panay kag Guimaras Island kun sa diin may natala nga kaso sang ASF.
Tuyo naman sang probinsya nga proteksyunan ang 6 bilyon nga swine industry sang Negros Occidental.*
