Patay si Brgy. Kapitan Danilo Dautil matapos ginluthang sa Brgy. Cabcab sa banwa sang Isabela sang gab-i sang Miyerkules, Agosto 24.
Suno kay PCAPT Joseph Partidas, hepe sang Isabela Municipal Police Station, papauli na kuntani ang kapitan nga nagasakay sa motorsiklo sang hinali ini ginluthang sang wala pa makilal-an nga suspetsado nga ginapatihan nagpanago sa katubuhan.
Nakaangkon ang kapitan sang mga igo sa ulo kag dughan nga gintunaan sang iya kamatayon.
Dugang pa ni Partidas, posible duha tubtub tatlo ka suspek ang naghimo sang krimen kag ginapatihan nga ginbantayan sang mga ini ang paglabay ni Kapitan Duatil sa lugar.
Wala na ang suksok nga relo, bag, kag kwarta sang kapitan matapos ini ginluthang, rason kun ngaa gina-alegar pagpangawat ang ginalantaw nga motibo sang mga suspek. Nahibaluan nga halin ang kapitan sa syudad sang Bacolod kag may ginkuha ini nga kwarta nga nagabalor sang P50,000 agud ipanagtag kuntani sa iya kaupdanan nga mga opisyales.
