BAGO CITY – Nagkiwi ang ilong sang 36-anyos nga barangay tanod matapos nga ginsumbag sang amay sang isa sa mga nagrambol sa Brgy. Malingin, sa syudad sang Bago, Negros Occidental, takna las-3:00 sang kaagahon sini nga adlaw, Setyembre 12.
Suno sa barangay tanod, nagtambag lang siya sa 22-anyos nga lalaki nga gina-pulihan sumbag sang lima ka iban pa nga mga solterito kagab-i sa Brgy. Malingin.
Apang ginpasibangdan ini nga nagbulig kastigo kag ginbalikan siya sang amay sang 22-anyos nga lalaki.
Ginkilala ang akusado kay Joemarie Suarez, yara sa ligal nga pang-edaron kag residente sang Purok Gabi, Brgy. Malingin.
Base sa panaysayon sang biktima, mapuli na siya kuntani kaina takna las-tres sang kaagahon sang ginbantayan siya ni Suarez sa bangga kag gulpiyada nga ginsumbag sa nawong.
Gilayon naman nga ginpunggan ang akusado sang iya nga mga himata kag gindala ang biktima sa Bago City Hospital agud mapabulong ang iya nagadugo nga ilong.
Luyag sang akusado nga makig-areglo apang desidido ang biktima nga pasakaan ini sang kaso.*
