Tuman nga kasubo ang nabatyagan sang pamilya Manuel, matapos nga nabawian sang kabuhi ang isa ka tuig nga bata sa ila pamilya.
Yara na sa kustodiya sang mga otoridad sa Nueva Ecija si Patrolman Crisdie Manuel, 33 anyos, matapos aksidente nga maigo sang bala ang iya anak nga lalaki nga naga edad pa lamang sang isa ka tuig.
Base sa imbestigasyon sang kapulisan, nag-abot sa ila puluy-an ang pulis nga malipayon pa nga ginsugata sang iya anak nga lalaki.
Kuguson na kuntani kag hakson sang amay ang bata, sang hinali lang nga nahulog ang service firearm sang amay.
Sang nagtupa na sa salog, naglupok ang armas kag naigo sang bala sa dughan ang bata.
Dali dali pa nga gindala sang amay nga pulis kag sang ila katupad balay ang biktima sa San Jose City General Hospital, apang gindeklarar nga dead on arrival.
Boluntaryo nga gin surrender sang pulis ang iya service firearm.
Yara na sa kustodiya sang PNP si Patrolman Manuel nga naka assign sa Nueva Ecija 2nd Provincial Mobile Force Company.
